Deklaratat e fundit të Forumit Musliman të Kosovës:

Deklaratë për shtyp
17 Qershor 2010

Shamia është parim e jo simbol islam

Forumi Musliman i Kosovës si organizatë e cila monitoron dhe mbikqyr vlerat e kulturës dhe traditës islame në Kosovë, në këto çaste në të cilën po kalon Kosova me vëmendje është duke i përcjellur zhvillimet aktuale politike e shoqërore dhe se është i shqetësuar dhe i shokuar pa masë me Projektrregulloren për arsim fillor dhe të mesëm të komunës së Prishtinës e bazuar në Udhëzimin Administrativ nr.7/2009 “Kodi i mirësjelljes dhe masat disiplinore për nxënës të shkollave të mesme të larta” të dekretuar nga Ministria e Arsimit, Shkencës dhe Teknologjisës së Kosovës dhe e nënshkruar nga ministri z.Enver Hoxhaj në të cilën në nenin 4, paragrafi 13 parasheh” ndalimin e bartjes së uniformës fetare” e që Kuvendi Komunal i Prishtinës e nënkupton me ndalimin e shamisë në shkollat publike të Prishtinës të hartuar në Projektrregulloren për arsim fillor dhe të mesëm.

Edhe poqese ndalemi te paragrafi i cekur më lartë, nga aspekti gjuhësor, ai nënkupton bartjen e uniformës fetare, e me uniformë nënkuptohet çdo person i uniformuar sikurse që është ushtari, polici, doganieri, doktori, imami, prifti të cilët gjatë shërbimeve të tyre mbajnë uniformën e caktuar. Po assesi nuk nënkupton ndalimin e shamisë së vajzave që ndjekin procesin edukativo-arsimor në shkollat publike të Kosovës. Porse zyrtarët komunal të Prishtinës, në Projektrregulloren e hartuar e nënkuptojmë  ndalimin e bartjes së shamisë në shkollat publike të Prishtinës, e cila si e tillë  është në kundërshtim të plotë me nenin 18 të Deklaratës së përgjithshme mbi të drejtat e njeriut të Asamblesë së Përgjithshme të Kombeve të Bashkuara, në kundërshtim të plotë me nenin 1 të Ligjit për Lirinë Fetare të Kosovës, në kundërshtim të plotë me nenin 2. të Ligjit kundër Diskriminimit në Kosovë.

Edhe pse nuk ka  Ligj të aprovuar në Kosovë lidhur me çështjen e mbajtjes së shamisë apo veshjes së vajzave sipas parimeve islame, ministri aktual i Arsimit, Shkencës dhe Teknologjisë së Kosovës z. Enver Hoxhaj, sigurisht aludon në, apo do të imitojë  adashin e tij , Enver Hoxhën, ish diktatorin komunist shqiptar i cili ka hyrë në historinë botërore si i vetmi në botë i cili me Ligj e ka ndalur fenë në Shqipëri në vitin 1967, e ky ministër z. Enver Hoxhaj, me po të njëjtën emër sikurse paraardhësi i tij, do që të hyjë në historinë më të re i cili jo me ligj, por me Udhëzim Administrativ  të ndalon bartjen e shamisë së vajzave muslimane, e që njëkohësisht do të thotë largimin e tyre nga shkolla, dhe se një veprim i tillë është i paprecedan, i cili  mohon të drejtën e shkollimit të mëtutjeshëm të vajzave muslimane me shami, e që është një krim edhe më i madh, që e parandalon apo ia pamundëson shkollimin e mëtutjeshëm  gjinisë femërore, që është një akt diskriminues, antinjerëzor, antihuman, antimoral, antifemëror. Edhe pse dita më ditë thiremi në drejtat njerëzore, në pjesëmarrjen e barabartë të gjinisë femërore në jetën publike dhe shoqërore, në  aspekt tjetër kundërshtohet kjo e drejtë themelore e gjinisë femërore, dhe se edhe pse  thirremi   që askush nuk është mbi Ligjin në Kosovë, apo se gjyqësia është e ndarë nga legjislativi dhe ekzekutivi, në anën tjerë vendimi i Gjykatës së Gjilanit për kthimin në shkollë të vajzës me shami, hudhet poshtë nga zyrtarët komunal të arsimit në Gjilan, me arsyetimin se për ata është ligjor vetëm vendimi i Rregullores komunale apo Udhëzimi Administrativ 7/2009 i Ministrisë së Arsimit, Shkencës dhe Teknologjisë, e jo zbatimi i vendimit të Gjykatës në Gjilan.

Forumi Musliman i Kosovës i bën thirrje zyrtarëve komunal të Prishtinës si dhe zyrtarëve të Ministrisë së Arsimit, Shkencës dhe Teknologjisë si dhe vet Ministrit z.Enver Hoxhaj të heqin dorë prej Rregulloreve dhe Udhëzimeve që bien ndesh me të gjitha konventat ndërkombëtare dhe Ligjet aktuale në fuqi të Kosovës e që cenojnë të drejtat elementare themelore njerëzore, e sidomos të gjinisë femërore.

Forumi Musliman i Kosovës i bën thirrje shqiptarëve musliman të Kosovës të jenë të matur dhe të vazhdojnë të kontribuojnë në harmoninë fetare dhe proceset politike nëpër të cilën po kalon Kosova, porse nuk do të vazhdojnë në përjetësi të duartrokisin dhe se , në zgjedhjet e ardhshme ,nuk do të votojnë politikanët dhe zyrtarët publik të cilët dhunojnë në mënyrë skandaloze të drejtat e tyre elementare fetare, e aq më shumë kur janë në pyetje të drejtat e gjinisë femërore muslimane.

FORUMI MUSLIMAN I KOSOVËS